कापी पेन्सिल बोकेर स्कुल जाने बेलामा
भाई बैनी बोकेर स्कुलको झ्याल बाहिरबाटै
चिहाएर मन बुझाउन सक्यौ कसरी ?
अहिले खाना खाउन छोरी भन्दै कोठा कोठामा
थाल बोकेर हिड्नुपर्छ
भर्खर १६ टेक्दा थाहा पनि नदिई
डोलि चढाई पराइ घर
पठाउँदाको पिडा सह्यौ कसरी ?
माया, ममता, दया, करुणा के हो ? सायद थाहै भएन होला
मात्र कर्तव्य निभाउने नाउँमा झिसमिसे
बिहानीबाट अँधेरी रातसम्म
काममा खट्थ्यौ कसरी ?
सायद गर्भधारण गर्न योग्य तिम्रो शरीर थिएन होला
घरायसी कामको बोझसँगै त्यो बालापनमै
४/४ सन्तान जन्माई मातृत्व धर्म निभायौ कसरी ?
नपढेकी तिमी, दुर्गम ठाउँ
हामी सँगैका साथी स्कुल नजाँदा पनि
हामीहरुलाई पढ्नुपर्छ भनेर उत्प्रेरित गरि
स्कुल पठाउन आट्यौ कसरी ?
मैले जानेदेखि तिम्रो जिवनयात्रा नियाल्ने कोशिश गर्छु
आमा,
यो धर्ती सरी नै सबथोक सहन गरेर हाँस्न सक्छेउ कसरी ?
कतै थियो होला आशा कुनै दिन
सुख शान्ति र सुकुन मिल्नेछ
तर, जति जति उमेरले नेटो काट्दै गयो
तिम्रो जीवनले अझ कठिनता भोगिरहेको परिस्थिति
सहजै स्वीकार्न सक्छेउ कसरी ?
तिम्रो जीवन देखेर म आफ्नो अनुमान लगाउन सक्छु
अनि बितृष्णाले मेरो मन फाट्न खोज्छ, चहर्याउन थाल्छ
आमा,
तिम्रो पहाड जस्तो जीवनमा पनि
धैर्यता, सरलता, सहनशीलतासँगै सँधै
सकारात्मक सोच्न सक्छेउ कसरी ?
जान्ने भएदेखिको दलदलमा फसेका तिम्रा खुट्टाहरु
उमेरले ६० कट्दा पनि निस्कन सकेनन्
आमा,
यति लामो समयसम्म पनि
दलदलबाट निस्कन नसकेको जीवन
सहज बाँच्न सक्यौ कसरी ?
तिमीलाई देखेर मेरो जीवनको आँकलन गर्छु
भविष्य छर्लङ्ग देखेको महसुस हुन्छ अनि
एकान्त र बैराग्य नै सत्यता हो भन्ने लाग्छ
आमा,
तिमीले सधैभरि मातृत्वको कर्तव्य निभाइरह्यौ
सन्तान हुनुको कर्तव्य निभाउन सकेनौं हामी
तर, सन्तान सुखको आशा आशामै सिमित रहँदा पनि
सधै मुस्कुराउन सक्छेउ कसरी ?
जीवनको यो मोडसम्म पनि
तिमीले चाहेको जीवन जिउन पाइनौ
आमा,
सक्छेउ भने हामीलाई क्षमा गर्नु
आशा अझै छ
तिम्रो चाहना पुरा हुनेछ
तिमीलाई खुशी शान्ती र सुकुन महसुस गराउने प्रण गर्छौं ।
विद्यालयदेखि नै कविता, गीत, गजल लेखन तथा नृत्य र गायनमा रुचि राख्ने शीतलको बाल्यकाल गुल्मीको ग्वादी वरपर बित्यो । त्यसैले, उहाँका रचनामा ग्रामीण जनजीवनको छनक पाइन्छ, प्राकृतिक सौन्दर्यको बखान भेटिन्छ । जीवनका भोगाइ, अनुभूति, समाजका तस्वीर र पुरुष सोचले निर्माण गरेका सामाजिक परिदृश्य उहाँका रचनामा प्रशस्त भेटिन्छन् । अखबारी लेखन र वाचनमा समेत रुचि राख्नुहुने शीतलका गीत, गजल र कविताहरू विभिन्न पत्रपत्रिकामा प्रकाशित छन् । निजामती सेवामा कार्यरत शीतल कार्यालय र घरको जिम्मेवारीबाट बचेको समय साहित्य लेखनमा खर्चिन रुचाउनुहुन्छ । शीतलका रचनालाई पाठक समक्ष पुर्याउने नेपालमतको स्तम्भ शीतल कुञ्ज मा उहाँको मधुर स्वरका रचना वाचन सुन्न र पढ्न सकिन्छ । - सम्पादक
प्रकाशित:
Tuesday, August 09, 2022 | 07:07:00 मंगलबार, २४ श्रावण, २०७९
