सुमधुर नयाँ गीत ‘तारा जुनैले’ सार्वजनिक भएको छ । प्रेम, आशा र वियोगको त्रिकोणात्मक भाव बोकेको यो गीतमा गायक ईश्वर सिंह र गायिका रितु कँडेलको सुमधुर स्वर छ । गायिका कँडेल संगीत क्षेत्रमा विषयगत पढाई भएकी गायिकाका रुपमा परिचित छिन् ।
गीतको अडियो जति मिठो छ, यसको भिडियो पनि उत्तिकै कलात्मक बनेको छ । निर्देशक बिनोद भण्डारी गीतको मर्मलाई पर्दामा उतार्न सफल भएका छन् । अभिनेता अनिल पौडेल र अभिनेत्री जुना गुरुङको जीवन्त अभिनयले प्रेम र विछोडको कथालाई दर्शकले महसुस गर्न सक्ने बनाएको छ । उनीहरूको रोमान्टिक र भावनात्मक दृश्यले गीतको भावलाई अझ गहिरोसँग प्रस्तुत गर्छ ।
गीतकार शिव हमालको शब्द रचनाले गीतको भावनात्मक गहिराइलाई बलियो बनाएको छ भने स्वयं गायक ईश्वर सिंहको संगीतले त्यसलाई जीवन्त धुन दिएको छ । एरेन्जर आशिष अविरलको संगीत संयोजनले गीतलाई आधुनिक र कर्णप्रिय बनाएको छ ।
गीतको अडियो राग स्टुडियोमा रेकर्ड गरिएको हो । दिनेश पराजुलीको छायांकन, मनोज कार्कीको सम्पादन र अनिमेशको मेकअपले भिडियोलाई प्राविधिक रूपमा अब्बल बनाएको छ ।
प्रकाशित:
Sunday, June 15, 2025 | 09:53:00 आइतबार, १ असार, २०८२
