टोखा, काठमाडौं - टोखा नगरपालिकामा सामाजिक क्षेत्रमा सेवा गर्ने उद्देश्यका साथ स्थापित समृद्ध नारी मञ्चको दोस्रो साधारण सभा गरिएको छ ।
'सबैका लागि समानता समृद्ध नारी मञ्चको प्रतिवद्धता' नाराका साथ आयोजित साधारण सभा टोखा नगरपालिकाको वडा नम्बर ६ का अध्यक्ष शान्ता पौडेलको प्रमुख आतिथ्यमा भएको थियो ।
कार्यक्रममा बोल्दै अध्यक्ष पौडेलले आगामी दिनमा मञ्चले अझै बढी स्थानीय संघ संस्था संग सहकार्य गर्दै अगाडी बढ्नु पर्ने सुझाव दिनुभयो । सार्वजनिक सम्पत्ति भएकोले मञ्चले आफ्ना जुनसुकै कार्यक्रम कम्युनिटी लर्निङ सेन्टरमा निर्धक्क भएर गर्न सक्ने समेत जानकारी दिनुभयो । साथै अध्यक्ष पौडेलले टोखा वडा नम्बर ६ अब छिटै नै बाल मैत्री घोषणा हुन लागेको समेत जानकारी दिनुभयो ।
मञ्चका अध्यक्ष विष्णु अर्यालको सभापतित्वमा सकिएको साधारण सभामा अध्यक्ष अर्यालले स्थापनाको छोटो समयमा यस संस्थाले आफ्नो उद्देश्य अनुसार काम गर्न सफल भएको बताउनु भयो । उहाँले आगामी दिनमा महिला, किशोरी तथा बालबालिकाको क्षमता अभिवृद्धि गर्ने, स्वास्थ्य शिक्षा र संस्कृतिको विकासमा नवीन कार्यक्रमको सुरुवात गर्ने योजनाका साथ अघि बढ्ने प्रतिबद्धता व्यक्त गर्नुभयो ।
विशिष्ट अतिथि सामाजिक अभियन्ता कपिलदेव थापाले महिलाहरु अगाडी बढेर गरेका कार्यक्रमहरु पक्कै पनि सफल हुन्छन् भन्दै नाम जस्तै समृद्ध नारी मञ्च पनि समृद्ध बन्दै जाने विश्वास व्यक्त गर्नुभयो ।
कार्यक्रममा संस्थाका कोषाध्यक्ष बसुधा भण्डारीले बार्षिक आयव्यय प्रतिवेदन सार्वजनिक गर्नुभएको थियो । टोखा नगरपालिका वडा नम्बर ६ मा अवस्थित कम्युनिटी लर्निङ सेन्टरमा भएको कार्यक्रममा संस्थाका अधिकांश सदस्यहरुको उपस्थित थियो ।
संस्थाका सचिव प्रमिला भण्डारीले कार्यक्रम सन्चालन गर्नुभएको थियो ।
प्रकाशित:
Monday, June 30, 2025 | 11:12:00 सोमबार, १६ असार, २०८२
2025-06-30-03-54-53.gif)
