उड्ने सपना देख्नेहरू पखेटा हाल्न सक्नुपर्छ ।
अधिकारको फल चाख्न कर्तव्यको विउ रोप्नुपर्छ । ।
टिपेर दिँदैन कोही फल यहाँ आफैले रुख चढ्नु पर्छ ।
पैंठेजोरी खोज्छन् अड्चनहरू पलपल, हिम्मतको बाटो मोल्नुपर्छ । ।
नबिर्स जन्म एक्लै, मृत्यु एक्लो हुनेछ ।
जति समय छ यो धर्तिमा सद्भाव स्नेह छर्नुछ । ।
मतलवी विचारको यो रित्तो गाग्रोलाई ।
आफ्नोपन करुणा र ममताले भर्नुछ । ।
उड्ने सपना देख्नेहरु पखेटा हाल्न सक्नुपर्छ ।
अधिकारको फल चाख्न कर्तव्यको विउ रोप्नुपर्छ । ।
घोप्ट्याई राख आशाको ढक्कन, तिमीलाई निराश हुनपर्न सक्छ ।
एक्लै कर्म गर्ने अठोट गर, जिन्दगी खुसीले भर्न सक्छ । ।
दोष कसैलाई नदेऊ, स्वीकार आफ्नो यथार्थलाई ।
जति छिटो बुझे उति सरल जीवनको बास्तविक अर्थलाई ।।
उड्ने सपना देख्नेहरू पखेटा हाल्न सक्नुपर्छ ।
अधिकारको फल चाख्न कर्तव्यको विउ रोप्नुपर्छ । ।
विद्यालयदेखि नै कविता, गीत, गजल लेखन तथा नृत्य र गायनमा रुचि राख्ने शीतलको बाल्यकाल गुल्मीको ग्वादी वरपर बित्यो । त्यसैले, उहाँका रचनामा ग्रामीण जनजीवनको छनक पाइन्छ, प्राकृतिक सौन्दर्यको बखान भेटिन्छ । जीवनका भोगाइ, अनुभूति, समाजका तस्वीर र पुरुष सोचले निर्माण गरेका सामाजिक परिदृश्य उहाँका रचनामा प्रशस्त भेटिन्छन् । अखबारी लेखन र वाचनमा समेत रुचि राख्नुहुने शीतलका गीत, गजल र कविताहरू विभिन्न पत्रपत्रिकामा प्रकाशित छन् । निजामती सेवामा कार्यरत शीतल कार्यालय र घरको जिम्मेवारीबाट बचेको समय साहित्य लेखनमा खर्चिन रुचाउनुहुन्छ । शीतलका रचनालाई पाठक समक्ष पुर्याउने नेपालमतको स्तम्भ शीतल कुञ्ज मा उहाँको मधुर स्वरका रचना वाचन सुन्न र पढ्न सकिन्छ । - सम्पादक
प्रकाशित:
Wednesday, June 01, 2022 | 21:42:00 बुधबार, १८ जेठ, २०७९
2025-06-30-03-54-53.gif)
