ताजा

  • बिहीबार, ३ श्रावण, २०८१
  • ०३:४३:०८
  • नेपालीको अभिमत

राजनीति

कांग्रेस र एमालेबीच सत्ता सहमति, ओली भित्रिने, देउवा प्रतिक्षामा बस्ने, प्रचण्ड बाहिरिने

नेपालमत

मंगलबार, १९ असार, २०८१

काठमाडौं - सत्ता परिवर्तनको पछिल्लो सरगर्मीले सोमबार मध्यराती टुंगो पाएको छ । दुई ठूला पार्टी नेपाली कांग्रेस र नेकपा एमाले वीच सत्ता साझेदारी हुने भएको छ । 

संविधान संशोधनमार्फत निर्वाचन प्रणालीमा सुधार गर्ने लगायत एजेन्डालाई केन्द्रमा राखेर कांग्रेस र एमालेबीच सत्ता सहकार्य गर्ने सहमति भएको हो । दुवै पार्टी वीच सम्झौतामा हस्ताक्षरको तयारी भएको दुवै पार्टी स्रोतले पुष्टि गरेका छन् । 

पहिलो पालोमा एमालेका अध्यक्ष केपी ओली प्रधानमन्त्री हुने र बाँकी चुनावी कार्यकालको नेतृत्व कांग्रेसका सभापति शेरबहादुर देउवाले गर्ने गरी दुई पार्टी सहमतिमा पुगेका हुन् । यी सबै विषयको सहमतिको खाका भने दुवै पार्टीका दोस्रो तहका नेताको पहलमा तय भएको हो । 

कांग्रेस र एमालेका दोस्रो तहका नेताले लामो समयदेखि गृहकार्य गरिरहेका भए पनि असार १५ गते शनिबार कांग्रेस सभापति शेरबहादुर देउवा र एमाले अध्यक्ष केपी शर्मा ओलीबीच ओली निवास बालकोटमा ३ घण्टा लामो छलफलपछि दुई दलबीच सहमतिका लागि बतावरण बनेको हो । 

दुई दलको सरकार बनेपछि निर्वाचन प्रणालीमा सुधार गर्ने लगायतका विषयमा संविधान संशोधन गर्ने सहमति पनि भएको कांग्रेसका एक नेताले बताए।

एमाले महासचिव शंकर पोखरेल र कांग्रेसका प्रमुख सचेतक रमेश लेखकले सोमबार साँझ ललितपुरको झम्सिखेलस्थित होटल भिभान्तामा बसेर सहमतिको अन्तिम टुंगो लगाएको स्रोतको भनाई छ । संविधानमा आवश्यक संशोधन गर्न पूर्वप्रधानन्यायाधीश कल्याण श्रेष्ठको नेतृत्वमा 'संविधान संशोधन सुझाव समिति' बनाउने तयारी गरिएको बताइएको छ । 

एमालेले अर्थसहित ९ वटा मन्त्रालय र कांग्रेसले गृहसहित १० वटा मन्त्रालय लिने बारेमा छलफल भएको वुझिएको छ । यस्तै कांग्रेस एमालेले तीनतीन प्रदेशमा मुख्यमन्त्री लिने र एक प्रदेशमा मधेसी दललाई मुख्य मन्त्री दिने खाका तय गरिरहेको स्रोतको भनाई छ।

नेपालमतका कुनै पनि सामग्रीबारे तपाईंको गुनासो, सुझाव र थप जानकारी अथवा नयाँ कुनै सूचना भए हामीलाई info.nepalmat@gmail.com मा इमेल पठाउनु होला।

थप समाचार

© 2024 कृष्णसार मल्टिमिडिया. All Rights Reserved