लोक तथा देउडा गायिका सपना शाहीलाई भारतमा सम्मानित गरिएको छ ।
प्रवासी साझा मञ्च भारतले चण्डीगढमा आयोजना गरेको विशेष सांगितिक कार्यक्रममा शाहीलाई 'भारती इन्टरनेशनल म्युजिक अवार्ड - २०२४' बाट सम्मानित गरिएको हो ।
उहाँलाई देउडा गीत तर्फको 'फिमेल क्याटेगोरी' तर्फ यस्तो अवार्ड दिइएको हो । स्थायी घर बाँकेको कोहलपुरबाट पछिल्लो समय काठमाडौंमा रहेर सांगीतिक क्षेत्रमा व्यस्त गायिका शाहीको स्वरमा रहेको 'तीन चुलिका अग्ला शीर बोल'को देउडा गीतबाट उहाँलाई अवार्ड प्रदान गरिएको हो । उक्त गीतमा शब्द नेमबहादुर शाही र लय धिरेन्द्र शाहीको रहेको छ ।
अन्तराष्ट्रिय स्तरको अवार्डले आफुलाई अझ उत्साही बनाएको र जिम्मेवारी थपेको भन्दै संगीत क्षेत्रमा अझ बढि साधना गर्ने उहाँको भनाई छ ।
विभिन्न स्टेज शोहरुमा बाक्लै देखिने शाहीका झण्डै तीन दर्जन गीत रेकर्ड छन् । शाहीका लोकदोहोरी गीत 'रुन परेपछि' देउडा गीत 'तिनचुलिका अग्ला शीर', लोकदोहोरी गीत 'तिम्रो हेराई ज्यानमारा' लगायतका गीत बढि चर्चित छन् ।
चण्डीगढको अवार्ड कार्यक्रममा भाग लिन नेपालबाट झण्डै तीन दर्जन कलाकार पुगेका थिए । फरक-फरक विधामा उनीहरुलाई समेत सम्मानित गरिएको थियो ।
प्रकाशित:
Wednesday, May 01, 2024 | 11:15:00 बुधबार, १९ बैशाख, २०८१
2025-06-30-03-54-53.gif)
