नेपालगञ्ज - बाँके जिल्ला फुटबल संघको आयोजनामा माघको पहिलो सातादेखि मेयर कप छात्र - छात्रा फुटबल प्रतियोगिता–२०८० हुने भएको छ । जिल्ला स्तरीय प्रतियोगिता माघ ६ देखि १३ गतेसम्म नेपालगन्जमा हुनेछ ।
प्रतियोगितामा बाँके जिल्लामा रहेका ८ वटा स्थानीयतहका विद्यालयहरुका छात्र - छात्रा टिमले सहभागिता जनाउने छन् ।
नेपालगन्ज उप–महानगरपालिकाको आर्थिक सहयोगमा हुने प्रतियोगिताका बारेमा बुधबार नेपालगन्ज उप–महानगरपालिका र बाँके जिल्ला फुटबल संघ वीच सम्झौता भएको छ । सम्झौता पत्रमा नेपालगन्ज उप–महानगरपालिकाका शिक्षा महाशाखाका उप–सचिव गोर्खबहादुर थापा र बाँके जिल्ला फुटबल संघका महासचिव कमल खत्रीले हस्ताक्षर गर्नु भएको छ ।
प्रतियोगितामा करिब ४० विद्यालयहरुको सहभागिता रहने प्रतियोगिता संयोजक एवम् बाँके जिल्ला फुटबल संघका उपाध्यक्ष निर्मल चन्दले जानकारी दिनुभयो । नेपालगन्ज उप–महानगरपालिकासँग सम्झौता भएलगत्तै प्रतियोगिताको तयारी तिव्र गतिमा अगाडी बढेको आयोजकको भनाई छ ।
बाँके जिल्ला फुटलल संघले विगतका वर्षमा मेयर कप जिल्ला स्तरीय छात्र–छात्रा प्रतियोगिता आयोजना गर्दै आएको थियो । कोभिड–१९ का कारण दुई वर्ष प्रतियोगिता हुन सकेको थिएन । प्रतियोगिताले विद्यालय स्तरबाट फुटबल खेलाडी उत्पादनमा सहयोग गर्ने अखिल नेपाल फुटलब संघका केन्द्रिय सदस्य एवम् बाँके जिल्ला फुटबल संघका अध्यक्ष भोजराज शाहीले बताउनुभयो ।
नेपालगन्ज उप–महानगरपालिका वडा नम्बर १ स्थित एन्फा ग्रासरुट फुटबल ट्रेनिङ सेन्टरमा प्रतियोगिताका खेलहरु हुनेछन् । नेपालगन्ज रंगशालामा सिन्थेटिक ट्रयाक निर्माणको काम जारी रहेकोले प्रतियोगिता धम्बोझीमा गर्नु परेको बाँके जिल्ला फुटबल संघले जनाएको छ । प्रतियोगिताको विजेता टिमले २१ हजार, उपविजेताले ११ हजार र सर्वोत्कृष्ट खेलाडीलाई पुरस्कृत गरिने संघले जनाएको छ ।
प्रकाशित:
Wednesday, January 03, 2024 | 22:21:00 बुधबार, १८ पौष, २०८०
.2024-12-16-08-44-41.jpeg)
2024-12-01-11-29-55.jpeg)
