काठमाडौं- नेपाली फिल्म प्रदर्शनका लागि नयाँ वर्षको मिति राम्रो मानिन्छ । यो समयमा प्रदर्शन भएका फिल्मले राम्रो व्यापार गरेका छन् । यही कारण यो मितिमा प्रदर्शनको सङ्ख्या धेरै हुने गर्छ ।
आउँदो नयाँ वर्षमा पनि चार फिल्मले प्रदर्शनको मिति तय गरेका छन् । ‘नाइँ नभन्नु ल ६’, ‘प्रसाद २’, ‘जारी’ र ‘बिहे पास’ ले प्रदर्शनको मिति घोषणा गर्दा नेपाली बजारले धान्ने या नधान्ने बहस सुरू भएको छ ।
वितरक करण श्रेष्ठ नयाँ वर्ष नेपाली फिल्मका लागि शुभ भए पनि भीडभाडले राम्रो सङ्केत गरेको छैन । “एकआपसमा भिड्नु राम्रो होइन । सरोकारवाला संस्थाले यहाँ भूमिका खेल्नु आवश्यक छ”, वितरक श्रेष्ठले भन्नुभयो, “दर्शकको आकर्षणमा परे अन्य समयमा पनि ऐतिहासिक व्यापार फिल्मले गरेका छन् । उदाहरणका रूपमा कबड्डी ३ र ४ लाई लिन सकिन्छ ।”
वितरक श्रेष्ठले भने झैँ कबड्डी को तेस्रो शृङ्खला सोह्र श्राद्धमा र चौथो शृङ्खला जेठमा प्रदर्शन भएका थिए । विगत केही वर्ष अगाडि फर्किने हो भने तीज, दसैँ, तिहारसमेतमा राम्रो व्यवसाय गरेको पाइन्छ । “अन्य समय फिल्म नचलेको भएकाले पनि निर्माता निर्देशकले नयाँ वर्षमा फिल्म थुपारेका हुन्”, फिल्म निर्माता, प्रदर्शक छविराज ओझाले भन्नुभयो ।
नयाँ वर्षमा दर्शक मनोरञ्जन खोज्दै हलसम्म पुग्छन् भन्ने विश्वास निर्माता, निर्देशकमा देखिन्छ । वितरक तथा प्रदर्शक गोपाल कायस्थ प्रदर्शनको मितिभन्दा पनि कन्टेन्टमा ध्यान दिन निर्माता तथा निर्देशकलाई सल्लाह दिनुहुन्छ । “दर्शक हलसम्म आउने मिति मात्र नभई हलसम्म तान्ने फिल्म बनाउन सक्नुपर्छ”, वितरक कायस्थले भन्नुभयो ।
नयाँ वर्षमा प्रदर्शन तय भएको फिल्म ‘बिहे पास’ का निर्मातासँगै वितरकसमेत रहेका रोहित कट्टेलले खाली मितिमा प्रदर्शन घोषणा गरिएको बताउनुभयो । “मैले कसैसँग भिडन्त गरेको होइन । खाली मितिमा अहिले चार फिल्म घोषणा भइसकेको छ । यसले राम्रो नतिजा दिँदैन”, उहाँले भन्नुभयो ।
प्रकाशित:
Sunday, February 05, 2023 | 21:19:00 आइतबार, २२ माघ, २०७९
2025-01-27-10-52-05.jpeg)
