काठमाडौं- नेपाली राष्ट्रिय क्रिकेट टोलीका अलराउन्डर मोहम्मद आदिल आलमले नेपाल टी-२० लिगमा म्याच फिक्सरको प्रस्तावअनुसार बलिङ गरेको प्रहरीको प्रारम्भिक अनुसन्धानमा खुलेको छ ।
नेपाल प्रहरीको केन्द्रीय अनुसन्धान ब्युरो (सीआईबी) ले मंगलबार पत्रकार सम्मेलन आयोजना गर्दै लिगमा भएको स्पट फिक्सिङ र लाइभ बेटिङबारे जानकारी दिएको हो ।
सीआईबीले पूर्वराष्ट्रिय क्रिकेट खेलाडीसमेत रहेका महबुब आलमले कम्तीमा २ जना नेपाली खेलाडीलाई आर्थिक प्रलोभन देखाई स्पट फिक्सिङको प्रयास गरेको खुलेको जनाएको छ ।
यता स्पट फिक्सिङमा चार फ्रेन्चाइज टिमका व्यवस्थापनकै संलग्नता देखिएको छ । फिक्सिङमा जम्मा १० जनाको संलग्नता देखिएको सीआईबीले जनाएको छ ।
जसमा चार टिम काठमाडौं नाइट्स, बिराटनगर सुपर किंग्स, जनकपुर रोयल्स र फरवेष्ट युनाइटेडका व्यवस्थापकै संलग्नता देखिएको छ ।
फिक्सिङमा एक नेपाली र एक विदेशी गरी २ जना खेलाडी संलग्न रहेको सीआईबीको दाबी छ ।
त्यस्तै आदिललाई एउटा नोबल र एउटा वाइड बल फाल्नका लागि एप्रोच आएको सीआईबीको अनुसन्धानमा खुलेको छ । उनले खेलेका कम्तीमा २ वटा खेलमा सोही प्रकृतिको खेल देखिएको पनि सीआईबीको दाबी छ ।
प्रहरीले आलम र पूर्वराष्ट्रिय क्रिकेटर महबुब आलम ‘लाइभ बेटिङ’ र ‘स्पट फिक्सिङ’ गरेको आरोपमा सोमबार पक्राउ गरेको थियो । सीआईबीले महबुबलाई विराटनगर र आदिललाई राजविराजबाट पक्राउ गरेको हो ।
प्रकाशित:
Tuesday, January 24, 2023 | 15:04:00 मंगलबार, १० माघ, २०७९
