काठमाडौँ - डडेलधुराको आलीताल गाउँपालिकाका कर्मचारीलाई कैलालीको जंगलमा 'लुटपाट' गरी हातखुट्टा बाँधेर फरार भएका तीन जनालाई प्रहरीले पक्राउ गरेको छ। पक्राउ पर्ने तीनै जना भारतीय नागरिक भएको जिल्ला प्रहरी कार्यालय कैलालीले जनाएको छ ।
पक्राउ पर्नेमा भारतको हरियाणा राज्यको सोनीपथ घर भएका २१ वर्षीय भगत सिंह, १८ वर्षीय साहिल बादलिसे र २० वर्षीय सन्नी जाट छन्।
प्रहरीले उनीहरूलाई कैलालीको गोदावरी नगरपालिका–१ स्थित भित्री सडकको जंगलामा फेला पारेको जनाएको छ।
कञ्चनपुरको बेदकोट नगरपालिका–३ घर भइ आलीताल गाउँपालिकामा कम्प्युटर अपरेटरका रुपमा कार्यरत ३७ वर्षीय लोकेन्द्र सिंह भण्डारीलाई प्रहरीले सोमबार कैलालीको गोदावरी नगरपालिका–०४ बुढीतोला (गाइमारे)को जंगलमा हात–खुट्टा बाँधिएको अवस्थामा फेला पारेको थियो।
कैलालीको खानीडाँडा जाने भनेर लिफ्ट दिएको र बुढीतोलाको उकालोमा उनीहरूले फोटो खिच्ने भनेर कार बाहिर बोलाइ गम्छा, कम्मर पेटी र डोरीले हात–खुट्टा तथा मुख बाँधेर जंगलमा छाडेर कार लगेर गएको बताएका थिए।
प्रकाशित:
Monday, June 27, 2022 | 17:42:00 सोमबार, १३ असार, २०७९
