इच्छा थियो नेपाल प्रहरीको इन्स्पेक्टर बन्ने । तर, टिभीमा समाचार पढेको देख्दा रुचि त्यता मोडियो । अहिले न त प्रहरी बन्नुभयो न त समाचार वाचक नै । बरु उहाँको यात्रा अन्तैतिर ढल्कियो । उहाँ अर्थात् चिरञ्जीवी सापकोटा (जीवी चिरन) ।
चिरनको घर सुर्खेत । कक्षा चारमा पढ्दैदेखि विद्यालयमा हुने हरेक कार्यक्रमका नाटकमा सहभागिता जनाउनुहुन्थ्यो । ६ कक्षासम्म पुग्दा त गाउँमा हुने सडक नाटकहरूमा भाग लिन थालिसक्नुभएको थियो ।
यसरी सानै उमेरदेखि नाटक खेल्नुभएका चिरन अहिले म्युजिक भिडिओमा अभिनय गर्न व्यस्त हुनुहुन्छ । तर, म्युजिक भिडिओमा आउनुभन्दा जेठो पेसा चाहिं पत्रकारिता हो ।
“धेरै समयसम्म के गर्ने, के बन्ने भनेर भेउ नै पाइनँ । रेडियोमा काम गरें, युट्युबमा काम गरें, हुँदाहुँदै कोरिया जाने तयारी पनि गरें । तर, अहिले भने कलाकारिता क्षेत्रमा रमाइरहेको छु,” नेपालमतसँगको कुराकानीमा चिरनले भन्नुभयो ।
चिरनका आमाबुवालाई छोराले सरकारी जागिर खाओस् भन्ने इच्छा थियो । त्यसैले बुवाको जोड उहाँलाई साइन्स अथवा कमर्श पढाउने थियो । तर, उहाँले पत्रकारिता विषय रोजेर मानविकी पढ्नुभयो । यो विषयमा उहाँ र बुवाबीच केही समय मनमुटाव पनि भयो ।
‘हेर यो मुटुमा चिरा पर्या छ’ गीतबाट अभिनय यात्रा थालनी गर्नुभएका चिरन अहिले चलचित्र बनाउने तयारीमा हुनुहुन्छ । ‘रेलको बाटो पुग्दैछ रे तिमी बस्ने शहरमा’ गीतमा अभिनय गर्न डोल्पा पुगेपछि उहाँले ‘रेलको बाटो’ चलचित्र बनाउने योजना बनाउनुभएको हो ।
रेडियो यात्रा
सडक नाटक हुँदै रेडियोमा नाटक खेल्न थालेपछि चिरनलाई रेडियोमा काम गर्न मन लाग्यो । अनि रेडियो जागरणमा हास्यव्यङ्ग्य कार्यक्रम शुरू गर्नुभयो । यो कार्यक्रम चर्चित भयो, उहाँलाई चिन्ने मान्छे पनि बढ्दै गए । छवि राम्रो बन्दै गएपछि पेसाकै रूपमा रेडियो पत्रकारिता शुरू गर्नुभयो । पत्रकारिता विषय लिएर पढ्नुभएका उहाँले रेडियो जागरणपछि रेडियो भेरीमा समाचार पढ्न शुरू गर्नुभयो । लामो समय भेरीमा काम गरेपछि रेडियो सुर्खेतमा काम गर्नुभयो । त्यसपछि भने जिल्ला छोडेर काठमाडौंतिर हानिनुभयो ।
युट्युब यात्रा
पहिलेदेखि टिभी समाचार वाचक बन्ने सपना बुन्नुभएका चिरन काठमाडौं छिरेपछि टेलिभिजनमा काम गर्न पुग्नुभयो । तर, आफूले सोचे जस्तो नभएपछि छोड्नुभयो । काठमाडौंमा बेरोजगार बस्नु आर्थिक हिसाबले महंगो हुने भएपछि रेडियो राजधानीमा काम थाल्नुभयो ।
रेडियो राजधानीपछि मेरो एफएम, नेपालवाणी नेटवर्कमा काम गर्नुभयो । त्यसपछि विन्दास टिभी नामक युट्युब च्यानल सञ्चालन गर्नुभयो । “मैले सञ्चालन गरेको यु्ट्युब च्यानल राम्रै चलेको थियो । पैसा पनि राम्रै कमाइ हुन्थ्यो । महिनामा दुई/तीन लाखसम्म कमाइ भयो । तर, अहिले यो पनि छोडेर कलाकारितामा लागेको छु,” चिरन भन्नुहुन्छ ।
अभिनय यात्रा
चिरन म्युजिक भिडिओमा अभिनय गर्न थाल्नुभएको धेरै भएको छैन । २०७६ सालमा विश्वव्यापी रूपमा फैलिएको कोभिड–१९ ले विश्व ठप्प भयो । धेरै देश ‘लकडाउन’मा गए । नेपालमा पनि चैत २०७६ मा पहिलो पटक लकडाउन भयो । मान्छे घरभित्रै बस्न थाले । तर, चिरनलाई भने त्यही वेला गीतमा अभिनय गर्ने अवसर मिल्यो । उहाँले ‘हेर यो मुटुमा चिरा पर्याछ’ भन्ने गीतमा अभिनय गर्नुभयो ।
‘हेर यो मुटुमा चिरा पर्या छ’ गीतबाट अभिनय यात्रा थालनी गर्नुभएका चिरन अहिले चलचित्र बनाउने तयारीमा हुनुहुन्छ । ‘रेलको बाटो पुग्दैछ रे तिमी बस्ने शहरमा’ गीतमा अभिनय गर्न डोल्पा पुगेपछि उहाँले ‘रेलको बाटो’ चलचित्र बनाउने योजना बनाउनुभएको हो ।
आफ्नो अभिनय रहेको पहिलो गीत चिरनलाई निकै फाप्यो । गीतले राम्रो भ्यूज पायो । त्यसपछि उहाँलाई अरू गीतबाट पनि प्रस्ताव आउन थाल्यो । ‘रेलको बाटो’ गीतमा अभिनय गरिसकेपछि भने उहाँ झनै परिचित हुनुभयो । हालसम्म चिरनले ७० भन्दा बढी गीतमा अभिनय गरिसक्नुभएको छ । उहाँलाई दुःखको गीतमा अभिनय गर्न मन पर्छ ।
स्व–अध्ययनबाटै अभिनय
विद्यालयमा नाटक देखाउँदा होस् या गाउँमा सडक नाटक देखाउँदा होस् चिरनले यस सम्बन्धी औपचारिक शिक्षा लिएर गर्नुभएको होइन । उहाँ समाजका निश्चित पात्रको क्यारेक्टरमा भिजेर अभिनय गर्नुहुन्थ्यो । यद्यपि; उहाँ १३ वर्षको छँदा काठमाडौंबाट सडक नाटक सिकाउन एउटा टोली सुर्खेत गएको थियो । त्यो वेला चाहिं अभिनय कसरी गर्ने भन्नेबारे पाँच दिने तालिम लिनुभएको थियो ।
“प्रायः नाटकमा मेरो भूमिका जाँडरक्सी खाएर समाजमा होहल्ला गर्ने पात्रको हुन्थ्यो । रक्सी खाएर श्रीमती पिट्नेदेखि लिएर समाजको अमनचयन बिगार्नेहरूप्रति मेरो व्यङ्ग्य रहन्थ्यो,” चिरन भन्नुहुन्छ ।
परिवारको भूमिका
चिरनका आमाबुवालाई छोराले सरकारी जागिर खाओस् भन्ने इच्छा थियो । त्यसैले बुवाको जोड उहाँलाई साइन्स अथवा कमर्श पढाउने थियो । तर, उहाँले पत्रकारिता विषय रोजेर मानविकी पढ्नुभयो । यो विषयमा उहाँ र बुवाबीच केही समय मनमुटाव पनि भयो । तर, पछि भने बुवा नै उहाँको फ्यान हुनुभयो ।
“त्यो वेला रेडियोमा बोल्ने भनेपछि गाउँमा ठूलै शान हुन्थ्यो । पहिले यो क्षेत्रमा लाग्दा रिसाउने बुवा पछि मेरै समाचार सुनेर बस्नुहुन्थ्यो,” चिरन भन्नुहुन्छ । अहिले चिरनका भाइ पनि यही क्षेत्रमा हुनुहुन्छ । आमाबुवा पनि खुशी नै हुनुहुन्छ ।
फिल्मी यात्रा
चिरन अहिले ‘रेलको बाटो’ चलचित्रको तयारीमा लागिरहनुभएको छ । यसको लागि कर्णालीको वस्तुस्थितिबारे अध्ययन गर्दै कथा लेखिरहनुभएको छ ।
कथा लेखिसकेपछि त्यसलाई पटकथामा ढाल्नुपर्ने उहाँ बताउनुहुन्छ । कुन ठाउँ रोज्ने, रेकर्ड कसरी गर्ने, कस्ता कलाकार छनोट गर्ने आदि कुरा बाँकी नै रहेको चिरनको भनाइ छ ।
प्रकाशित:
Saturday, January 15, 2022 | 06:59:00 शनिबार, १ माघ, २०७८
