• सोमबार, १ कार्तिक, २०७८
  • ०१:५७:३२

च्याउ खेतीमा सक्रिय महिलालाई अन्तर्राष्ट्रिय पुरस्कार

  • नेपालमत
  • मंगलबार, १९ असोज, २०७८- १३:१५:००/ Tuesday 10-05-21

पाल्पा– कन्ये च्याउको व्यावसायिक खेती गर्नुभएकी दिलकुमारी रोकामगर २०२१ का लागि विश्वका ग्रामीण क्षेत्रमा काम गर्ने दश महिलाको सूचीमा पर्नुभएको छ । उहाँले वुमन वल्र्ड समिट फाउन्डेसन (डब्लुडब्लुएसएफ) जेनेभा, स्वीटजरल्यान्डबाट हरेक वर्ष प्रदान गरिने एक हजार डलर राशिको पुरस्कार प्राप्त गर्नुभएको हो ।

उहाँ पाल्पाको तिनाउ गाउँपालिका–३ भूतखोलास्थित पाल्पा बुटवल सडक खण्डमा कन्ये च्याउको व्यावसायिक खेती गर्दै आउनु भएको छ । उहाँ साहसी र अग्रणी सिर्जनशील महिलाका रुपमा छनोटमा पर्नुभएको हो ।

डब्लुडब्लुएसएफले हरेक वर्ष ग्रामीण क्षेत्रमा अहोरात्र खट्ने विश्वभरका दश महिलालाई सम्मान गर्दै आएको छ ।

उहाँको फार्ममा हाल एक हजार सात सय बल्ब च्याउ छन् । एक दशकअघि दुई सय बल्बबाट व्यवसाय थालनी गर्नुभएकी दिलकुमारीले गत वर्ष च्याउ बिक्रीबाट सात लाख आम्दानी गर्नुभएको छ । उहाँले यस वर्ष करिब नौ लाखसम्म कमाई गर्ने लक्ष्य राख्नुभएको छ । धेरै उत्पादन हुँदा दैनिक एक क्विन्टलसम्म च्याउ घरबाटै बिक्री गर्ने दिलकुमारीले सिद्धार्थ राजमार्गमा व्यवसाय भएकाले पनि बिक्री गर्न झन्झट नभएको बताउनुहुन्छ । यहाँ उत्पादन भएको च्याउ पाल्पा तथा बुटवल बजारमा खपत भइरहेको छ । 

नेपालमतका कुनै पनि सामग्रीबारे तपाईंको गुनासो, सुझाव र थप जानकारी अथवा नयाँ कुनै सूचना भए हामीलाई nepalmatnews@gmail.com मा इमेल पठाउनु होला।