काठमाडौं - नेपालमा अब अन्तर्राष्ट्रिय सीमाबाट ५ किलोमिटर दुरी भित्र क्यासिनो खोल्न नपाइने भएको छ ।
प्रतिनिधिसभाबाट बुधबार पारित भएको सम्पत्ति शुद्धीकरण (मनी लाउन्डरिङ) निवारण तथा व्यावसायिक वातावरण प्रवर्धन सम्बन्धी केही ऐनलाई संशोधन गर्ने विधेयक, २०८० ले पर्यटन ऐन–२०३५ मा संशोधन गरेर यस्तो व्यवस्था ल्याएको हो ।
यो ऐनले क्यासिनो सञ्चालन इजाजतपत्र दिन सकिने मापदण्डमा अन्तर्राष्ट्रिय दुरी ५ किलोमिटर तोकेको छ । यसअघि यो दुरी तीन किलोमिटर मात्र थियो ।
यसैगरी क्यासिनो अब चारतारे र त्यसभन्दा माथिका होटलमा मात्र चलाउन पाइने छ ।
संशोधित प्रावधान अनुसार नयाँ नियम सुरू हुनुअघि तीन किलोमिटर भित्र कानुन अनुसार इजाजत पत्र लिएकाको हकमा निरन्तर चलाउन पाइने छ । तर, चारतारे वा त्यसभन्दा माथिका होटलमा मात्र चलाउन पाइने मापदण्ड पूरा नभएका क्यासिनोले भने यो स्तर र मापदण्ड पूरा गरी ५ किलोमिटर भित्र स्थानान्तरण गर्नुपर्ने समेत नियम बनेको छ ।
स्थानान्तरणका लागि तीन वर्षको समय दिइने छ । यस्तै नयाँ प्रावधान अनुसार एक कम्पनीलाई एकभन्दा बढी क्यासिनो इजाजत नदिइने भएको छ । यसैगरी क्यासिनोको इजाजतपत्रको अवधि एक वर्षको हुनेछ र इजाजतपत्र नवीकरण अवधि एक महिना बाँकी छँदै गर्नुपर्ने गरी प्रावधान राखिएको छ ।
प्रकाशित:
Wednesday, February 07, 2024 | 20:40:00 बुधबार, २४ माघ, २०८०
.2024-12-16-08-44-41.jpeg)
