नेपालगञ्ज - नेपालगञ्जका फुटाहा सडक र पासाङ ल्हामु मार्गमा कालोपत्रे हुँदैछन् ।
दुवै सडक अस्फाल्ट प्रविधिबाट कालोपत्रे हुन लागेका हुन् । नेपालगञ्ज १९ फुटाहादेखि एसके डेरी उद्योगसम्म ३ सय ७५ मिटर दुरीमा ६ मिटर चौडा बाटो तथा सुर्खेतरोडदेखि टाँगा स्टेशन जोड्ने ५ सय ५० मिटर दुरीमा ८ मिटर चौडा पासाङ ल्हामु मार्ग अस्फाल्ट पीच गरिदैछ । यी दुबै सडक स्तरोन्नति कार्यको बुधबार मेयर प्रमुख प्रशान्त विष्टले सुभारम्भ गर्नुभएको छ ।
फुटाहा सडक लुम्बिनी प्रदेशको समपूरक बजेट र नेपालगञ्ज उपमहानगरपालिकाको संयुक्त लागतमा पीच हुन लागेको हो । ६० लाख बजेटमा बन्न लागेको उक्त सडक सात भाई निर्माण सेवासंगको ठेक्का सम्झौतामा असार १५ गतेभित्र सम्पन्न हुने इन्जिनियर ईश्वरी सापकोटाले जानकारी दिनुभयो ।
नगरस्तरीय ७५ लाख बजेटमा अस्फाल्ट पीच हुन थालेको पासाङ ल्हामु मार्ग असार १५ गतेभित्र निर्माण सम्पन्न गर्ने गरी पिके कन्स्ट्रक्सनसंग ठेक्का सम्झौता गरिएको छ ।
यसैवीच नेपालगञ्जको बागेश्वरी मन्दिरको पूर्वतर्फ रहेको बागेश्वरी चिल्ड्रेन पार्कको सौन्दर्यकरण कार्य पनि सुरु भएको छ । मेयर विष्टले बुधबारनै एक कार्यक्रमका बीच पार्क सौन्दर्यकरण कार्यको सुभारम्भ गर्नुभएको छ । बागेश्वरी काल भैरव कन्स्ट्रक्सनले ३० लाख बजेटमा पार्कको वरिपरि पर्खाल निर्माण, माटो पटान, ग्राभेल लगायतका काम असार मसान्तसम्म गर्ने गरी सम्झौता भएको नेपालगञ्ज उपमहानगरपालिकाले जनाएको छ ।
नेपालगञ्ज उपमहानगरपालिकाले त्यस क्षेत्रमा रहेका अस्थायी ब्यापारिक सटरहरु डोजर लगाएर भत्काएको थियो ।
प्रकाशित:
Wednesday, January 24, 2024 | 17:46:00 बुधबार, १० माघ, २०८०
