नेपालगन्ज - नेपालगन्ज उपमहानगरपालिकाले रातो नम्बर प्लेटका इ-रिक्सालाई यात्रु बोक्न प्रतिबन्ध लगाउने भएको छ ।
नेपालगन्ज उपमहानगरपालिकाको आयोजनामा शुक्रबार जिल्ला प्रशासन कार्यालय बाँकेमा बसेको सरोकारवालाबीचको वैठकमा निजी प्रयोजनका लागि खरिद गरिएका रातो नम्बर प्लेटका इ-रिक्सामा यात्रु बोक्ने क्रम बढेपछि अबदेखि यात्रु बोक्न प्रतिबन्ध लगाइने सहमति भएको हो ।
रातोलाई कालो नम्बर प्लेट बनाउन लगाउने र त्यसका लागि १५ दिने सूचना जारी गर्ने निर्णय गरिएको मेयर प्रशान्त विष्टले बताउनुभयो ।
यस्तै नेपालगन्ज उपमहानगरपालिका क्षेत्रभित्र पर्ने इ-रिक्सा चलाउने अधिकांश चालकहरुले सवारी चालक अनुमतिपत्र (लाइसेन्स) विना नै इ रिक्सा चलाइरहेकले ती चालकलाई लाइसेन्स दिलाउनका लागि नेपालगन्ज उपमहानगरपालिका, यातायात व्यवस्था कार्यालय, ट्राफिक प्रहरी लगायत सम्पूर्ण सरोकारवालाको समन्वयमा सहजीकरण गरिदिने निर्णय भएको छ ।
रातो नम्बर प्लेटका इ-रिक्सालाई कालो नगराएको अवस्थामा प्रचलित कानुन बमोजिम कार्वाही गरिने निर्णय समेत भएको मेयर विष्टले बताउनुभयो ।
नेपालगन्ज उपमहानगरपालिकामा हाल २ हजार ८ सय इ-रिक्सा मात्र सूचीकृत भएका छन् ।
वैठकमा प्रमुख जिल्ला अधिकारी श्रवणकुमार पोख्रेल, जिल्ला प्रहरी प्रमुख प्रहरी उपरीक्षक सुवासचन्द्र बोहरा, ट्राफिक प्रहरी प्रमुख गोपीचन्द्र सुवेदी, यातायात व्यवस्था कार्यालयका प्रतिनिधि, नेपालगन्ज उद्योग बाणिज्य संघका प्रतिनिधि, नागरिक समाजका प्रतिनिधि लगायत सरोकारवालाको सहभागिता थियो ।
प्रकाशित:
Friday, November 10, 2023 | 23:41:00 शुक्रबार, २४ कार्तिक, २०८०
2023-12-11-10-45-55.jpeg)
