काठमाडौं – जाजरकोट केन्द्रविन्दु बनाएर शुक्रबार राति आएको भूकम्पमा परी ज्यान गुमाउनेको संख्या एक सय ५७ पुगेको छ।
गृहमन्त्रायले जनाए अनुसार शनिबार बेलुकासम्म जाजरकोटमा एक सय ५ र रूकुम पश्चिममा ५२ जनाले ज्यान गुमाएका छन् भने ३ सय ७५ जना घाइते भएका छन्।
गृहमन्त्रालय अन्तर्गतको विपद् पूर्वतयारी तथा प्रतिकार्य शाखाका अनुसार अहिलेसम्म राहत अन्तर्गत जाजरकोटमा ५ सय त्रिपाल, ५० स्लिपिङ ब्याग र एक सय थान ब्ल्यांकेट वितरण गरिएको छ। त्यस्तै रूकुमपश्चिममा पनि एक सय त्रिपाल, ५० स्लिपङ ब्याग र एकसय थान ब्ल्यांकेट वितरण भएको छ।
भूकम्प प्रभावित क्षेत्रमा उद्धार, राहतका लागि नेपाली सेनाका एक सय ८४, नेपाल प्रहरीका ८ सय २७ र सशस्त्र प्रहरी बलका ३ सय २८ जनशक्ति परिचालन भएको विपद् पूर्वतयारी तथा प्रतिकार्य शाखाले जनाएको छ।
शुक्रबार राति ११ बजेर ४७ मिनेटमा जाजरकोटको बारेकोट गाउँपालिका–१ रामिडाँडामा केन्द्रबिन्दु भएर ६ दशमलव ४ रेक्टर स्केलको भूकम्प भएको थियो। घाइतेहरूको उद्धार गरी जाजरकोट, सुर्खेत, बाँके तथा काठमाडौँका अस्पतालमा उपचार भइरहेको छ । भुकम्पबाट नीजि र सरकारी धनजनको क्षति भएको छ ।
जाजरकोट भुकम्पका घाइतेको भेरी अस्पताल, नेपालगञ्जमा उपचार हुँदै । तस्वीर : कृष्णा पाठक
प्रकाशित:
Saturday, November 04, 2023 | 22:39:00 शनिबार, १८ कार्तिक, २०८०
2023-12-11-10-45-55.jpeg)
