काठमाडौं- जिम्बावेमा आगामी जुन १८ देखि जुलाई ९ तारिखसम्म आयोजना हुने आईसीसी एकदिवसीय विश्वकप छनोट क्रिकेटमा सहभागी हुने १० टोलीको टुङ्गो लागेको छ ।
आयरल्यान्डले सोझै विश्वकप खेल्ने अवसर गुमाएसँगै छनोट खेल्ने सबै टोलीको टुङ्गो लागेको हो । आयरल्यान्डले विश्वकप सुपरलिगको शीर्ष आठमा रहँदै सोझै छनोट खेल्ने मौका गुमाएको हो ।
आयरल्यान्ड र बंगलादेशबीच सुपर लिगको अन्तिम सिरिजको पहिलो खेल वर्षाका कारण रद्द भएर अंक बाँडे पछि आयरल्यान्डले छनोट खेल खेल्नु पर्ने भएको हो ।
अब छनोटमा वेस्ट इन्डिज, श्रीलंका, जिम्बावे, आयरल्यान्ड, नेदरल्यान्ड्स, स्कटल्यान्ड, ओमान, नेपाल, अमेरिका र संयुक्त अरब इमिरेट् (युएई) बीच प्रतिस्पर्धा हुनेछ । नेपालले आईसीसी विश्वकप लिग(२ मा तेस्रो बन्दै छनोट खेलमा स्थान बनाएको हो ।
स्कटल्यान्ड लिग-२ को पहिलो र ओमान दोस्रो बन्दै छनोटमा पुगेको हो । छनोट खेलमा सहभागी हुने १० टोलीलाई दुई समूहमा विभाजन गरिनेछ । समूहबाट शीर्ष तीन तीन टोलीले सुपर सिक्समा स्थान बनाउनेछन् ।
सुपर सिक्समा एक अर्कासँग खेलेपछि शीर्ष दुईमा रहने टोली आगामी अक्टोबर नोभेम्बरमा भारतमा हुने एकदिवसीय विश्वकपमा छनोट हुनेछन् । भारतमा हुने विश्वकपमा कूल १० टोलीको सहभागिता रहनेछ ।
विश्वकपमा आयोजक भारत, पाकिस्तान, अस्ट्रेलिया, न्युजिल्यान्ड, बंगलादेश, इङ्ल्यान्ड, अफगानिस्तान र दक्षिण अफ्रिकाले स्थान बनाएका छन् ।
प्रकाशित:
Wednesday, May 10, 2023 | 17:43:00 बुधबार, २७ बैशाख, २०८०
.2024-12-16-08-44-41.jpeg)
2024-12-01-11-29-55.jpeg)
