काठमाडौं–वाग्मती प्रदेश सरकारले बढाएको सार्वजनिक सवारी साधानको भाडा दर लागु भएको छ । वाग्मती सरकारको भौतिक पूर्वाधार विकास मन्त्रालयले केही दिन अघि लागु गरेको भाडा दर आज (सोमबार) देखि लागु भएको छ ।
नयाँ भाडादर अनुसार काठमाडौं उपत्यकामा सार्वजनिक यातायात चढ्नासाथ पाँचकिलोमिटरको १८ रुपैयाँ लाग्ने छ । यसैगरी १० किमिसम्म २३ रुपैयाँ, १५ किमिसम्म २७ रुपैयाँ, २० किमिसम्म ३० रुपैयाँ र २० किमिभन्दा माथि ३५ रुपैयाँ भाडा लाग्ने भएको छ ।
यता काठमाडौं उपत्यका बाहिर पनि साबिकको भाडादरमा केही प्रतिशत वृद्धि भएको छ । जसमा यात्रुले १५ केजीसम्म निःशुल्क र त्यसमाथि १० केजीसम्म प्रतिकेजी ५ रुपैयाँका दरले सरसामान वा गुन्टा लैजान पाउनेछन् ।
केही समय अघि संघीय सरकार मातहत रहेको यातायात व्यवस्था विभागले अन्तरप्रदेश चल्ने सार्वजनिक सवारी साधनको भाडा २८ प्रतिशतसम्म वृद्धि गरेको थियो । यात्रुबाहक सवारी साधनको भाडा २८ प्रतिशत, तराईमा चल्ने सवारी साधनमा २० प्रतिशत र पहाडमा चल्ने मालबाहक सवारी साधनमा २६ प्रतिशत भाडा बढाइएको थियो ।
प्रकाशित:
Monday, October 18, 2021 | 12:54:00 सोमबार, १ कार्तिक, २०७८
2025-06-30-03-54-53.gif)
