• सोमबार, १ कार्तिक, २०७८
  • ०२:०४:०८

रुबी खानलाई बिहीबार अदालतमा उपस्थित गराउन प्रहरीलाई सर्वोच्चको आदेश 

  • नेपालमत
  • मंगलबार, २६ असोज, २०७८- १७:३१:००/ Tuesday 10-12-21

काठमाडौँ- नेपालगञ्जकी गैरसरकारी संस्थाकर्मी रुबी खानलाई असोज २८ गते बिहीबार बिहान  अदालतमा उपस्थित गराउन प्रहरीलाई सर्वोच्च अदालतले मंगलबार आदेश दिएको छ ।

सरकारविरुद्ध प्रदर्शनका क्रममा माइतीघर मण्डलाबाट गत शुक्रबार राति पक्राउ परेकी खानलाई बिहीबार बिहान ११ बजे अदालतमा उपस्थित गराउन र  सुनुवाई प्रक्रिया नसकिएसम्म जिल्ला प्रहरी कार्यालय बाँकेको हिरासतबाट अन्यत्र नसार्न प्रहरीलाई सर्वोच्च अदालतले मंगलबार आदेश दिएको हो ।

सर्वोच्च अदालतका न्यायाधीश आनन्दमोहन भट्टराईको एकल इजलासले मंगलबार सो आदेश दिएको हो ।

न्याय माग्न भन्दै नेपालगञ्जबाट २० दिन हिँडेर काठमाडौं आएका १४ जनाको टोलीलाई माइतीघरमा शुक्रबार साँझ धर्ना बसिरहेको बेला प्रहरीले नियन्त्रणमा लिएको थियो ।

सो समूहकी अगुवा रुबी खानलाई वेपत्ता पारिएको भन्दै अधिवक्ता मोहना अन्सारीले सर्वोच्चमा बन्दी प्रत्यक्षीकरणको निवेदन दिनु भएको थियो ।

प्रहरीले गत शुक्रबार माइतीघर मण्डलबाट पक्राउ गरी रुबीलाई नेपालगञ्ज पठाएको थियो ।

रुबीले अहिले जिल्ला प्रहरी कार्यालय बाँकेको हिरासत कक्षमा अनसन शुरु गरेको प्रहरीले जनाएको छ । 

नेपालमतका कुनै पनि सामग्रीबारे तपाईंको गुनासो, सुझाव र थप जानकारी अथवा नयाँ कुनै सूचना भए हामीलाई nepalmatnews@gmail.com मा इमेल पठाउनु होला।