सल्यान- सल्यानमा दशैंको मासुका विषयमा भएको विवादमा बाबुले प्रहार गरेको धारिलो खुर्पाले लागेर छोराको मृत्यु भएको छ ।

मासुको विषयलाई लिएर विवाद भएपछि सल्यान जिल्लाको बन्गाड कुपिण्डे नगरपालिका १० माझकाँडाका वर्ष ५५ का नीमबहादुर कँवरले प्रहार गरेको धारिलो खुर्पाले लागेर उनका ३३ वर्षीय छोरा रुपलाल कँवरको मृत्यु भएको प्रहरीले जनाएको छ ।

मंगलबार दिउँसो बाबु छोराबीच मासुको विषयमा भएको सामान्य विवाद बढ्दै जाँदा राति करिब १० बजे बाबुको  हातबाट छोराको मृत्यु हुन पुगेको हो ।

जिल्ला प्रहरी कार्यालय सल्यानका प्रहरी प्रवक्ता,प्रहरी निरीक्षक अर्जुन पौडेलका अनुसार राति मदिरा खाएपछि झगडाले तीब्र रुप लिएको थियो ।

रुपलालको घटनास्थलमै मृत्यु भएको प्रहरीले जनाएको छ ।

छोराको हत्यामा संलग्न नीमबहादुरलाई प्रहरीले नियन्त्रणमा लिएको छ ।