काठमाडौं- नेपालमा लक्षित जनसंख्याको ३२ प्रतिशतले कोरोना भाइरसविरुद्ध पूर्ण मात्रा खोप लगाइसकेको स्वास्थ्य तथा जनसंख्या मन्त्रालयले शुक्रबार जनाएको छ ।

देशभर कोरोना विरुद्धको खोपको पूर्ण मात्रा लगाउनेको संख्या ६९ लाख ६२ हजार १ सय ६४ रहेको छ ।

त्यसैगरी, ८७ लाख ३ हजार ७ सय ५ जनाले पहिलो मात्राको खोप लगाएको मन्त्रालयले जनाएको हो ।

सरकारले १८ वर्षभन्दा माथिका ३ करोड १७ लाख ५६ हजार ७ सय ६३ जनालाई खोप लगाउनु पर्ने लक्षित वर्ग अन्तर्गत् राखेको जनाएको छ ।

उपत्यकाका ७४ प्रतिशतले पाए पूर्ण मात्रा खोप

काठमाडौ उपत्यकाका तीन जिल्ला भक्तपुर, ललितपुर र काठमाडौंका ७४ प्रतिशत जनसंख्याले पूर्ण मात्रा खोप लगाइसकेका छन् ।

उपत्यकामा कोरोना विरुद्धको पहिलो मात्रा खोप ८१ प्रतिशतले लगाएको स्वास्थ्य तथा जनसंख्या मन्त्रालयले जनाएको हो ।

काठमाडौ उपत्यकामा १८ वर्षमाथिका ३१ लाख ३९ हजार ७ सय ७३ जनालाई कोरोनाविरुद्ध खोप लगाउने लक्षित वर्गमा राखिएको मन्त्रालयले जनाएको छ ।