काठमाडौं–सत्ता सझेदार दल नेकपा (माओवादी केन्द्र) को सोमबार (आज) बसेको स्थायी कमिटीको बैठक सम्पन्न भएको छ । केन्द्रिय पार्टी कार्यालय पेरिसडाँडामा विहान बसेको पार्टीको स्थायी कमिटीको बैठक सम्पन्न भएको छ ।
बैठकपछि पार्टीका प्रवक्ता कृष्णबहादुर महराले पार्टीको आगामी राष्ट्रियसम्मेलनको बारेमा छलफल भएको र सम्मेलनलाई केन्द्रविन्दुमा राखेर प्रदेश सम्मेलन, स्थानीय सम्मेलन, पार्टी सदस्यता नवीकरण, विभागहरू गठनको विषयका बारेमा छलफल जानकारी दिनु भएको छ ।
महराले भन्नु भएको छ, ‘स्थायी कमिटीको बैठकमा पार्टीका बारेमा विभिन्न कुराहरू उठेका छन्, तर निष्कर्षमा पुगेको छैन, छलफलकै क्रममा छन्, खास गरेर आगामी सम्मेलनकै विषयमा छलफल भएको छ ।’
आजको बैठक निष्कर्षमा नपुगेपछि भोलि (मंगलबार) बिहान ८ बजे फेरि स्थायी कमिटीको बस्ने र एजेण्डा प्रवेश गर्ने महराले बताउनु भएको छ । माओवादी केन्द्रले कार्तिक १३ गते वडा र मङ्सिर ४ गते पालिकाहरुको सम्मेलन गर्ने तयारी गरेको छ । यस्तै माओवादी केन्द्रले पुस ११ गतेदेखि १३ गतेसम्म राष्ट्रिय सम्मेलन गर्दै छ ।
प्रकाशित:
Monday, October 18, 2021 | 13:04:00 सोमबार, १ कार्तिक, २०७८
