केन्द्र अथवा प्रदेशमा कुनै पनि सांसद मन्त्री हुन नपाउने एजेण्डा बोकेर अग्रसर हुन ढिला भइसक्यो । स्वतन्त्र वा कुनै दलले यसमा अग्रसरता लिए हुने ।
पार्टीको एउटा सांसद मन्त्री भएपछि उसले कमाएको, काम गर्न नसकेको, बिचौलिया पोस्दै आफू अकुत कमाउँदै गरेको पक्ष पनि विरोध गर्न नसक्नेहरुको भीड छ । आफ्नै सहकर्मीको विरोध भन्दा बचाउ गर्नुपर्ने बाध्यतामा छन् दलका मान्छेहरु । राम्रो गर्नेलाई खुलेर सहयोग र तारिफको पनि वातावरण छैन ।
सांसद नै मन्त्री हुने प्रणालीले संसद निस्कृय भयो । मन्त्री, संसद र संसदीय समितिहरु प्रति जिम्मेवार भएनन् ।
जनताको सेवा र जिम्मेवारीबोध गर्नबाट चुक्दै गएका सांसदहरुलाई अब जनताले सहने छैनन् । हाइ काढ्दै संसदमा मोबाइलमा घोरिएका वा स्वादहीन प्रस्तुतिमा उत्रेका सांसदहरुबाट आम मानिस बिरक्तिएका छन् । सांसदहरुमा मन्त्री बन्ने लोभ र मन्त्रीहरुको संसदप्रतिको उदासिनताले निराशा चुलिंदैछ ।
संसदमा नभएका तर आफ्नो क्षेत्रका योग्य र विज्ञ सम्मिलित टीम बनाउन प्रधानमन्त्रीलाई स्वतन्त्रता दिने परिपाटी बनाउँ । देशको समृद्धिका लागि, सरकार र संसदको सक्रियताका लागि यो एउटा उपाय हुनसक्छ । राजनीतिक दलहरुले बेलैमा यसबारे नसोच्ने हो भने उनीहरुकै महत्व घट्दै जानेछ ।
https://www.facebook.com/harithapanepal
प्रकाशित:
Saturday, June 11, 2022 | 19:49:00 शनिबार, २८ जेठ, २०७९
