काठमाडौं- ‘नेपाल अन्तर्राष्ट्रिय नाट्य महोत्सव’को दोस्रो संस्करण आउँदो मंसिर ९ गतेदेखि राजधानीको थापागाउँस्थित मण्डला थिएटरमा हुने भएको छ ।
‘सामाजिक रुपान्तरणका लागि रङ्गमञ्चः विविधताको उत्सव’ भन्ने नाराका साथ ९ दिनसम्म चल्ने महोत्सवमा देशविदेशका २३ नाटक मञ्चन हुनेछन् ।
महोत्सवमा आवेदन परेकामध्येबाट ५ नेपाली नाटकसहित १६ देशका २३ वटा नाटक छनोट भएका छन् ।
महोत्सवमा नेपालसहित अमेरिका, बेलायत, रुस, स्पेन, इटाली, आर्मेनिया, अर्जेन्टिना, इजिप्ट, उरुग्वे, नाइजेरिया, बेलारुस, भारत, भुटान, र श्रीलंकाबाट छानिएका नाट्य समूहले नाटक मञ्चन गर्नेछन् ।
महोत्सव निर्देशक तथा मण्डला थिएटरकी अध्यक्ष सिर्जना सुब्बाले भारत, उरुग्वे, कम्बोडियाआदि देशका प्रसिद्ध कलाकार तथा अभियन्ताले कार्यशाला तथा तालिम सञ्चालन गर्ने बताउनु भयो । उहाँका अनुसार महोत्सवका लागि २३ देशका कुल ८५ वटा नाटकले आवेदन दिएका थिए ।
महोत्सवकी संयोजक विजया कार्कीले ५ नेपाली नाटकमध्ये मण्डलाले हाल सञ्चालन गरिरहेको ‘नाटक लेखन परियोजना २०२२’ बाट छानिएका उत्कृष्ट नाटकलाई महोत्सवको समापन सत्रमा मञ्चन गरिने जानकारी दिनु भयो । मण्डला थिएटरका संस्थापक अध्यक्ष तथा अभिनेता दयाहाङ राईले महोत्सव नेपाली रङ्गमञ्चको विकास र समृद्धिका लागि एक प्रयास भएको बताउनु भयो । उहाँले ३ वर्षअघि धेरै नाट्य संस्था र नाटकघरसँग मिलेर आयोजना गरेको पहिलो महोत्सव सम्झदैं देशमा कला, साहित्य, संगीतलगायतका महोत्सवको आवश्यकता औंल्याउनु भयो ।
महोत्सवले १ लाख रुपैयाँको इनोभेटिभ आइडिया अवार्डको पनि घोषणा गरेको छ । यस अवार्डका लागि रङ्गमञ्चसँग सम्बन्धित नाटक लेखन, निर्देशन, निर्माण तथा अनुसन्धानकालागि इच्छुकहरुले अवधारणा पत्र पठाउन सक्नेछन् । जसमध्ये एक अवधारणालाई अवार्ड प्रदान गरिने जनाइएको छ ।
प्रकाशित:
Tuesday, September 27, 2022 | 09:21:00 मंगलबार, ११ असोज, २०७९
2025-01-27-10-52-05.jpeg)
