मलाई शुद्ध बुद्ध चाहिएको छ
सास फेर्न गारो भएको यो वेला
शरीरभित्र हावा शुद्ध चाहिएको छ ।
हेर्दाहेर्दै समय क्रुद्ध भएका वेला
तेस्रो आँखा भएको बुद्ध चाहिएको छ
मनको ज्योति चलायमान राख्दै
तनको राजमार्ग अवरुद्ध चाहिएको छ ।
आविष्कार नयाँ चाहिएको छ
हतियार नयाँ चाहिएको छ
पुराना चिन्तनहरू पखाल्ने
पानी नयाँ चाहिएको छ
शुद्ध पानी पत्ता लगाउने
हिमालयकै बुद्ध चाहिएको छ ।
अस्तित्व अन्देखा कोशाम्शले सिध्याउने वेला
वस्तीहरू अन्जान लसपसमै रित्याउने वेला
ठूलठूला मिशाइल किन चाहिएको छ ?
ए पुराना बुद्ध फेरि आउ अहिले
पुराना मिशाइल दफ्नाउने
अर्को मसानघाट चाहिएको छ
शीरमा सिद्धार्थ चाहिएको छ
मानवतालाई पराजित गर्ने
पुरुषार्थ चाहिएको छैन
ॐकार चाहिएको छ
अहंकार चाहिएको छैन
साथी चाहिएको छ
शासक चाहिएको छैन ।
मलाई मान्छे भइरहन
अहिले भगवान् चाहिएको छैन ।
दुई आँखा दुई कान र एक मन भएको
मेरै शुद्ध बुद्ध चाहिएको छ ।
प्रकाशित:
Monday, May 16, 2022 | 12:22:00 सोमबार, २ जेठ, २०७९
