काठमाडौं- २ लाख रुपैयाँ घूस लिएको आरोपमा अख्तियार दुरुपयोग अनुसन्धान आयोगले काठमाडौंका १ सब इन्जीनियरमाथि मुद्दा दायर गरेको छ ।
जलश्रोत तथा सिंचाई विकास डिभिजन कार्यालय, बसुन्धरा, काठमाडौंमा कार्यरत सब–इन्जीनियर दिपेन्द्रकुमार केसीविरुद्ध अख्तियारले सोमबार भ्रष्टाचार मुद्दा दायर गरेको छ ।
इन्जीनियर केसीले कलभर्ट निर्माण कार्यको ठेक्का सम्झौता बमोजिम कार्य सम्पन्न गरी अन्तिम बिल भुक्तानी दिने क्रममा सेवाग्राहीसँग २ लाख रुपैयाँ घूस माग गरेको पाइएको आयोगले जनाएको छ ।
आयोगको टोलीले सब इन्जीनियर केसीलाई सेवाग्राहीबाट घुस लिइसकेको अवस्थामा नियन्त्रणमा लिइएको जनाएको छ ।
सबइन्जीनियर केसीमाथि भ्रष्टाचार निवारण ऐनअनुसार बिगो २ लाख कायम गरी जरिवाना र कैद सजाय माग गरिएको आयोगले सोमबार विज्ञप्ति जारी गरी जनाएको छ ।
प्रकाशित:
Monday, November 22, 2021 | 19:17:00 सोमबार, ६ मङ्सिर, २०७८
