काठमाडौं - काठमाडौंको किर्तिपुरमा मन्टेश्वरी तालिम मार्फत् शिक्षा क्षेत्रमा योगदान पुर्याएको भन्दै एक दशकदेखि मन्टेश्वरी तालिम केन्द्र संचालन गरिरहेकी दुर्गाकुमारी धिताललाई सम्मान गरिएको छ ।
लामो समयदेखि सामाजिक क्षेत्रमा कृयाशील सगरमाथा प्रतिष्ठान नेपालले आफ्नो २५ औं वार्षिकोत्सवको अवसरमा धिताललाई 'उत्कृष्ट शिक्षा सम्मान २०८२' बाट सम्मानित गरेको संस्थाका अध्यक्ष नरबहादुर लिम्बुले जानकारी दिनु भयो । स्वास्थ्य मन्त्री प्रदीप पौडेलको प्रमुख आतिथ्यतामा किर्तिपुरमा आयोजित विशेष समारोहमा पूर्वमन्त्री तथा संघीय सांसद राजन केसीले उहाँलाई सम्मान प्रदान गर्नु भएको थियो ।
आफुले संचालन गरेको सनबीम मन्टेश्वरी ट्रेनिङ सेन्टरले हालसम्म एक हजार बढि महिलाहरुलाई तीन महिने सीपमुलक तालिम प्रदान गरेको संस्थापक तथा निर्देशक धितालको भनाई छ । यो सम्मानले आफुलाई यस क्षेत्रमा अझ धेरै सेवा गर्ने प्रेरणा मिलेको धितालले बताउनु भयो । महिलाहरुलाई तालिम मार्फत् स्वरोजगार बनाउने ध्येयले २०७२ सालमा ट्रेनिङ सेन्टर खोलेको धितालले बताउनु भयो ।
सो अबसरमा नेपालको आर्थिक, सामाजिक, शैक्षिक, सांस्कृतिक र पर्यटन विकासमा विशेष योगदान पुर्याउँदै आएका विभिन्न विशिष्ट व्यवसायीहरूलाई सम्मान गरिएको आयोजकले जनाएको छ । अध्यक्ष लिम्बुका अनुसार प्रतिष्ठानले स्थापना कालदेखि नै राष्ट्र निर्माणमा सक्रिय भूमिका खेलेका विभिन्न क्षेत्रका विशिष्ट व्यक्तित्वहरूलाई नियमित रूपमा सम्मान गर्दै आएको छ ।
प्रकाशित:
Wednesday, August 06, 2025 | 21:13:00 बुधबार, २२ श्रावण, २०८२
