सल्यान- नेपाल कम्युनिस्ट पार्टी एकीकृत समाजवादीकी नेतृ रामकुमारी झाँक्रीले एमाले अध्यक्ष केपी शर्मा ओली नक्कली राष्ट्रवादी भएको टिप्पणी गर्नु भएको छ ।
बुधबार सल्यानको सल्लीबजारमा आयोजित अगुवा कार्यकर्ता भेलालाई सम्वोधन गर्नुहुँदै नेतृ झाँक्रीले केपी ओलीले कुरा राष्ट्रवादको गर्ने र काम आफ्नो व्यक्तिगत स्वार्थसिद्धिको गर्ने गरेको आरोप लगाउनु भयो ।
उहाँले ओलीको नक्कली राष्ट्रवाद धेरै दिन नटिक्ने पनि बताउनु भयो ।
उहाँले भन्नुभयो,–‘खड्गप्रसाद ओली बाहिरी रुपमा जति राष्ट्रियताको पक्षमा देखिएको पनि त्यो उनको वाहिरी आवरणमात्र हो, नकाबमात्र हो, त्यो छिट्टै पूरै उत्रन्छ ।’
केपी ओली पार्टी र मुलुकको हितमा भन्दा पनि आफ्नो निहित स्वार्थ परिपूर्ति गर्ने उद्देश्यले अघि बढ्दा माधव नेपाल र झलनाथ खनालहरु आफैंले जन्माएको हुर्काएको पार्टी छाड्न बाध्य हुनु परेको बताउनु भयो ।
धेरै लामो संघर्षबाट प्राप्त उपलब्धिको रुपमा रहेको संविधान नै सिध्याउने तरिकाले अघि बढे पछि आफूहरु विद्रोह गर्न बाध्य भएको नेतृ झाँक्रीको तर्क थियो ।
जनआन्दोलन भइरहँदा बयलगाडा चढेर अमेरिका पुग्न सकिदैन भन्ने ओलीले अहिले बाध्यताले स्वीकार गरे पनि गणतन्त्रलाई असफल बनाउन उद्दत रहेको उहाँको भनाई छ ।
कार्यक्रममा एकीकृत समाजवादीका नेता प्रकाश ज्वालाले एमाले पार्टीमा भस्मासुर प्रविधिले गर्दा समस्या आएको बताउनु भयो ।
आफूहरु एमालेमात्र नभई कम्युनिष्ट एकताको ध्येय लिएर हिंडेको तर केपी ओली भित्रको अहंकार र मैमत्त भावनाले एमाले पनि सग्लो रहन नसकेको नेता ज्वालाको भनाई थियो ।
प्रकाशित:
Wednesday, September 15, 2021 | 18:07:00 बुधबार, ३० भदौ, २०७८
