काठमाडौं - नइ प्रकाशनले २०७८ सालको नइ पुरस्कार घोषणा गरेको छ ।
६ जनालाई नइ प्रकाशनबाट सम्मानित गरिन लागेको प्रकाशनले जनाएको छ ।
सुनगाभा विशेषज्ञ प्रा. डा. विजया पन्तलाई ‘नइ देरुनीख प्रदीप्ति पुरस्कार’ र साहित्यकार श्रीमती गङ्गा लिगललाई ‘नइ रेखा पुरस्कार’ प्रदान गरिने भएको छ । यी दुवै पुरस्कारका राशि ताम्रपत्रसहित जनही साठी हजार रुपियाँ रहेका छन् ।
त्यसैगरी काठमाडौँ उपत्यका बाहिर रहेर नेपाली भाषा साहित्यमा क्रियाशील कञ्चनपुरका श्रीमती नारा जोशीलाई ‘नइ बुलु शर्मा पुरस्कार’, साहित्यकार ठाकुर बेलवासेलाई ‘नइ देरुनीख गौरव पुरस्कार’ र तेस्रोलीङ्गी भक्ति शाहलाई ‘नइ रामलक्ष्मी पुरस्कार’ प्रदान गरिने छ ।
यी तीनै पुरस्कारको राशि ताम्रपत्रसहित जनही पचास हजार रुपियाँ रहेको छ ।
साथै मिस नेवा कृसा महर्जनलाई ताम्रपत्रसहित पच्चीस हजार रुपियाँ राशिको ‘नइ देरुनीख पौरख पुरस्कार’ प्रदान गरिने प्रकाशनले निकालेको प्रेस विज्ञप्तिमा उल्लेख छ ।
नइ प्रकाशनका अध्यक्ष इन्दिरा प्रसाईको अध्यक्षतामा बसेको नइ प्रकाशनको बैठकले यी निर्णय लिएको हो।
प्रकाशित:
Sunday, May 15, 2022 | 19:07:00 आइतबार, १ जेठ, २०७९
