परिस्थिति प्रतिकूल भई वातावरण घुमिल भइरहँदा पनि
देखेर तिम्रो शालीनता अचम्म लाग्छ
विम्व नियालेर कहाँ चिन्न सकिने रहेछ र खुबीहरु
प्रत्यक्ष देखेपछि अनौठा तिम्रा प्रतिभा अचम्म लाग्छ
हावा, हुरी र झटारोयुक्त वर्षाको संकेत भइसक्दा पनि
देखेर तिम्रो सौम्य अति धैर्यता अचम्म लाग्छ
झट्ट हेर्दा आँखा जुधाउँन गार्हो लाग्ने तिम्रो व्यक्तित्व
कपासझैं नरम स्वभाव अनि ममतामयी मन अचम्म लाग्छ
जीवन जिउने कला सिकोस त कसैले तिमीबाट सिकोस्
तिम्रो उदारता अति प्रखरतादेखि अचम्म लाग्छ
हरेक अप्ठ्याराहरुका सजिला र सकारात्मक पक्ष भेटाउन सक्ने
तिम्रो दृश्य आँकलन देखेर अचम्म लाग्छ
विद्यालयदेखि नै कविता, गीत, गजल लेखन तथा नृत्य र गायनमा रुचि राख्ने शीतलको बाल्यकाल गुल्मीको ग्वादी वरपर बित्यो । त्यसैले, उहाँका रचनामा ग्रामीण जनजीवनको छनक पाइन्छ, प्राकृतिक सौन्दर्यको बखान भेटिन्छ । जीवनका भोगाइ, अनुभूति, समाजका तस्वीर र पुरुष सोचले निर्माण गरेका सामाजिक परिदृश्य उहाँका रचनामा प्रशस्त भेटिन्छन् । अखबारी लेखन र वाचनमा समेत रुचि राख्नुहुने शीतलका गीत, गजल र कविताहरू विभिन्न पत्रपत्रिकामा प्रकाशित छन् । निजामती सेवामा कार्यरत शीतल कार्यालय र घरको जिम्मेवारीबाट बचेको समय साहित्य लेखनमा खर्चिन रुचाउनुहुन्छ । शीतलका रचनालाई पाठक समक्ष पुर्याउने नेपालमतको स्तम्भ शीतल कुञ्ज मा उहाँको मधुर स्वरका रचना वाचन सुन्न र पढ्न सकिन्छ । - सम्पादक
प्रकाशित:
Thursday, May 12, 2022 | 12:33:00 बिहीबार, २९ बैशाख, २०७९
