एजेन्सी– कोरोना महामारीले ठप्प पारेका फिल्महलहरु खुल्न साथ बलिउड फिल्म प्रदर्शनका लागी लाइन लागेका छन् । पछिल्ला महिना दिन यता बलिउडका ठूला बजेटका फिल्महरू ले पनि सिनेमा हल तताउदै आएका छन् । यही महिना सार्वजनिक भएको अक्षय कुमार र कट्रिना कैफ अभिनीत फिल्म शुर्यबंशीले ३ सय करोडको हाराहारीमा व्यापार गरिरहेको छ ।
यस्तैमा बलिउडका भाइजान सलमान खानको 'अन्तिम' र जोन अब्राहमको 'सत्यमेव जयते–२' बिच यतिखेर घम्सा–घम्सी चलिरहेको छ । एकैदिन दुई एक्सन फिल्म रिलिज भएका छन् । गत शुक्रवार सार्वजनिक भएका यी दुवै फिल्मले थ्रिएटर तताउने मात्र हैन बक्स अफिसमा पनि राम्रै कमाइ गर्न सफल बनेका छन् ।
प्रर्दशनको पहिलो दिननै सलमानको अन्तिमले सुखद सुरुवात गरेको छ । फिल्मले पहिलो दिन साढे ४ करोड कमाई गरेको थियो । यस्तै दोस्रो दिन साढे ५ करोड र तेश्रो दिन आइतबार फिल्मले साढे ७ करोड कमाई गरेको छ ।
महेश मान्जरेकरको निर्देशनमा बनेको फिल्म अन्तिमले आइतबार सम्म १८ करोडको कारोबार गरेको छ । अन्तिममा सलमानसँगै आयुष शर्मा, महिमा मकवानाको मुख्य अभिनय रहेको छ ।
यस्तै जोन अब्राहम र दिव्या घोषला कुमारको मुख्य अभिनय रहेको फिल्म सत्यमेव जयते–२ ले भने सलमानको अन्तिमले जति व्यापार गर्न सकेको छैन । प्रदर्शनमा आएको पहिलो दिन यस फिल्मले साढे ३ करोडको हाराहारीमा व्यापार गरेको थियो ।
यस्तै फिल्मले दोस्रो दिन २ करोड १० लाख, दोश्रो दिन २ करोड २० लाख र तेस्रोदिन साढे २ करोड व्यापार गरेको छ । मिलाप जावेरीको निर्देशनमा बनेको फिल्मले हाल सम्म साढे १० करोडको व्यापार गरेको छ ।
प्रकाशित:
Monday, November 29, 2021 | 14:43:00 सोमबार, १३ मङ्सिर, २०७८
