रुकुम पश्चिम- रुकुम पश्चिमको जिल्ला सदरमुकाम खंलगामा प्रहरी र युवाबीच झडप हुँदा ७ जना प्रहरी घाइते भएका छन् ।
शुक्रबार राति बागबजारमा भएको झडपका क्रममा प्रहरी सहायक निरीक्षक कोमलराज बोहरासहित ७ जना प्रहरी घाइते भएको जिल्ला प्रहरी कार्यालयका सूचना अधिकारी प्रहरी निरीक्षक कपिल शाहीले जानकारी दिनु भयो ।
घाइते प्रहरी सहायक निरीक्षक बोहरालाई राति नै थप उपचारको लागि नेपालगञ्ज मेडिकल कलेज शिक्षण अस्पताल कोहलपुर ल्याइएकोमा थप उपचारका लागि काठमाडौं पठाइएको छ ।
सहायक निरीक्षक बोहराको तल्लो भागका तीन वटा दाँत झरेको र माथिल्लोपट्टीको एउटा दाँत हल्लिएको र टाउकोमा गम्भीर चोट लागेको प्रहरीले जनाएको छ ।
त्यसैगरी प्रहरी हवल्दार कालीबहादुर बोहराको दाहिने हातको बुढी औलामा र ढाडमा चोट लागेको, प्रहरी जवान लक्ष्मण गुरुङको टाउकोमा सामान्य चोट लागेको र अन्य चार जना प्रहरी कर्मचारीहरू पनि सामान्य घाइते भएको प्रहरीले जनाएको छ ।
घटना मदिरा खाएका युवाले रोकिइ राखेको ट्रकमा ढुंगा हानेको खबरपछि भएको र घटनाबारे थप अनुसन्धान शुरु गरिएको प्रहरीले जनाएको छ ।
घटनामा संलग्न केही युवालाई पक्राउ गरिएको पनि प्रहरीले जनाएको छ ।
पक्राउ पर्नेमा मुसीकोट नगरपालिका– ५, का २० वर्षीय नरेश पुनमगर, १ नम्बर वडाका १८ वर्षीय राजनप्रकाश गिरी, सोहि वडाका २० वर्षीय आकाश परियार रहेका छन् ।
त्यस्तै रुकुम पूर्वको भुमे गाउँपालिका घर भई हाल मुसीकोट नगरपालिका ५ बस्ने २३ वर्षीय मर्कुश पुन मगर, मुसिकोट नगरपालिका–१०, का २४ वर्षीय खडानन्द केसी, मुसीकोट नगरपालिका–१, का २५ वर्षीय हरिबहादुर घर्ती पक्राउ परेका छन् ।
प्रकाशित:
Saturday, October 16, 2021 | 15:07:00 शनिबार, ३० असोज, २०७८
