काठमाडौं–विवादका कारण गैरआवासीय नपाली संघ (एनआरएनए) को १० औं विश्व सम्मेलन तथा चुनावी कार्यक्रम स्थगित भएको छ ।
संघको अक्टोबर २० मा निर्वाचन र अक्टोबर २३ देखि २५ सम्म हुने १० औं विश्व सम्मेलनका कार्यक्रम स्थगित भएका हुन् ।
प्रतिनिधि चयन लगायतका विषयमा उजुरी परेपछि परराष्ट्र मन्त्रालयले दुई पटक सम्म पत्र काटेर विवादको टुंगो नलागेसम्म निर्वाचन नगर्न पत्राचार गरेपछि संघको आइतबार बसेको बैठकले १० औं विश्व सम्मेलन तथा चुनावी कार्यक्रम स्थगित गर्ने निर्णय गरेको संघका प्रवक्ता डिबी क्षेत्रीले बताउनु भएको छ ।
संघको अन्तर्राष्ट्रिय कार्यकारी सचिवालयको आइतवार बसेको बैठकले आगामी ६ महिनाभित्र निर्वाचन गर्ने गरि हाललाई स्थगित गरेको उहाँको भनाइ छ । विधानमा भएको प्रावधानअनुसार ६ महिनाभित्र निर्वाचन गर्नेगरी सम्मेलन सर्ने निर्णय भएको हो ।
विश्व सम्मेलनमा प्रतिनिधि विवादबारे परराष्ट्र मन्त्रालयको पत्रमा अस्पष्टता देखिएपछि निर्वाचनका सबै प्रकृया रोकिएको हो । संघमा प्रतिनिधि नयाँ वा पुरानो कार्यसमिति कसले छान्ने भन्ने बारेमा लगायतका विवाद छन् । अध्यक्षका प्रत्यासी कुल आचार्य पक्षले पनि पूर्वअभ्यास अनुसार नै हुनुपर्ने माग राख्दै परराष्ट्रमा उजुरी दिएपछि विवाद हुँदै आएको थियो ।
प्रकाशित:
Monday, October 11, 2021 | 09:49:00 सोमबार, २५ असोज, २०७८
