काठमाडौं- गृहमन्त्री बालकृष्ण खाँणले पर्यटन सहितका कोभिड प्रभावित व्यवसायको पुनरोत्थान गर्न योजना र कार्यक्रमसहित सरकार अघि बढेकोे बताउनुभएको छ ।
गृह मन्त्रालयमा बुधबार आयोजित अन्तरक्रियामा गृहमन्त्री खाँणले कोरोना संक्रमण नियन्त्रण गरी सबै व्यवसाय पूर्ववत् अवस्थामा फर्काउन सरकार प्रयत्नशील रहेको बताउनुभयो ।
गृहमन्त्री खाँणले कोरोना संक्रमणको जोखिम घट्दै गए आगामी केही दिनमा नै रात्रीकालीन व्यवसायहरू समेत पूरा समय सञ्चालन गर्न सकिन्छ कि भनेर सरकारले सोचिरहेको बताउनु भयो ।
गृहमन्त्री खाँडले बुधबार ठमेल क्षेत्रका पर्यटन व्यवसायीहरू संग छलफल गर्नु भएको हो ।
कार्यक्रममा गृह मन्त्रालयका सचिव टेकनारायण पाण्डे, काठमाडौका प्रमुख जिल्ला अधिकारी गोविन्दप्रसाद रिजालसहितका अधिकारीहरुले व्यवसायीका तर्फबाट आवश्यक पहल भए सहजीकरण गर्न सरकार तयार रहेको बताउनु भयो ।
गृहमन्त्रीसंगको छलफलमा व्यवसायीहरूले चौविसै घण्टा व्यवसाय सञ्चालन गर्न पाउनुपर्ने, लामो समय बन्द रहेका व्यवसायको पुनरूत्थानका लागि राहतका प्याकेजहरू ल्याउनुपर्ने, रात्रीकालीन व्यवसायलाई ब्यवस्थित र मर्यादित बनाउन नियमन तथा सूचीकरणको उचित प्रवन्ध गर्नुपर्ने लगायतका मागहरू राख्नु भएको थियो ।
प्रकाशित:
Wednesday, September 29, 2021 | 20:03:00 बुधबार, १३ असोज, २०७८
